Şəxsi brendin ilkin təməli insanın ixtisaslaşması və müəyyən sahə üzrə inkişaf etməsi ilə formalaşır.
«Report» xəbər verir ki, bu fikirləri jurnalist, təhsil eksperti, rəqəmsal media və reklam strategiyaları üzrə mütəxəssis Mürsəl Əliyev Report Media Məktəbinin tələbələri ilə keçirilən görüşdə səsləndirib.
Təhsil eksperti qeyd edib ki, şəxsi brend anlayışı əzəldən mövcud olub:
«Şəxsi brend yaratmaq ideyası yeni yaranmayıb, əvvəllər də olub, lakin bunun reallaşması dövrə uyğun dəyişib. Ötən əsrin şəxsi brend nümunələri kimi kitabları göstərmək yerinə düşərdi. Sosial şəbəkədə paylaşım etmək əvəzinə o zaman insanlar əsər yazıb gündəmə gəlirdilər».
Mütəxəssis uğurun təsadüf olmadığını, davamlı fəaliyyət və düzgün strategiyanın vacibliyini də qeyd edib.
Mürsəl Əliyev 1985-ci ildə Bakıda anadan olub. Bakı Dövlət Universitetinin Jurnalistika fakültəsini 2009-cu ildə bitirib.
Mediada jurnalist kimi fəaliyyətə hələ tələbəlik dövründən başlayıb. Müxtəlif illərdə «First News», «Turan», «Trend» İnformasiya Agentliklərində çalışıb. Peşəkar fəaliyyəti boyu sosial, beynəlxalq siyasət, təhsil və informasiya texnologiyaları mövzularında məqalə və analitik yazılar hazırlayıb.
2012-ci ildən yutub platformasında texnologiya və təhsil mövzularına həsr olunmuş videobloq fəaliyyəti ilə məşğuldur.